福摩思探偵案精選（台英雙語•附台語朗讀）(精裝)

＜內容簡介＞

探偵故事ê經典雙人組合
走揣藏tī懸疑怪案當中ê真相
福摩思、華生ê精彩冒險
用台灣話親切轉寫，在地氣味加添刺激趣味

「世界文學台讀少年雙語系列」以建立青少年對在地主體ê認同以及hùn闊ê世界觀為目標，按算thai選各國世界名著，以台文進行忠於原典ê翻譯轉寫，收錄原文雙語。透過台灣話閱讀經典文學ê真髓，引tshuā讀者認bat各國無時間、空間ê真實面腔kap文化內涵。

謝樂．福摩思是全世界上有名ê探偵。Tī 19世紀ê英國倫敦，伊kah伊ê有志華生醫生蹛tī貝克街221號之B，接受uì sì-kè來ê委託，kā人解決各種疑難雜案。

本冊收錄〈波希米亞ê見笑代〉、〈點仔帶奇案〉兩篇故事。按華生醫生ê紀錄，hōo讀者ē tuè福摩思巧妙ê頭殼來看hia奇怪ê案件，進行探偵、查案ê冒險，kah福摩思做伙解破背後ê複雜謎題。

【出版贊助】天母扶輪社


★本書特色：

1. 全世界通人知ê出名探偵──Sherlock Holmes「福爾摩斯」經典冒險故事，台英直譯，親切加倍。
2. 附台語有聲朗讀QRcode，配合故事情境ê活跳配樂，閱讀對照無負擔，台英學習真利便。
3. 插畫家鸚鵡洲精彩插圖，表現緊張刺激ê懸疑情境，硬精裝典藏。


★名人推薦：

　許慧如（國立台灣師範大學台灣語文學系教授兼系主任）
　何信翰（國立臺中教育大學台灣語文學系副教授）
　陳豐惠（李江却台語文教基金會執行長、《台文通訊bong報》總編輯）
　既晴（台灣犯罪作家聯會執行主席）
　洪敍銘（推理文學研究者）
　齊喬安（台灣犯罪作家聯會成員）


★目錄：

序一｜Tshuā領讀者行到另外一个文化世界／譯者陣
序二｜創造更加多元ê台文讀本／賴香光
序三｜Khiā台灣，看世界！／陳麗君

1. 波希米亞ê見笑代
2. 點仔帶奇案

I. A SCANDAL IN BOHEMIA
II. THE ADVENTURE OF THE SPECKLED BAND 173

團隊簡介


＜作者簡介＞

計畫主編｜陳麗君
國立成功大學台灣文學系教授。新營人。專長領域是台灣原住民、新住民、台語族群等跨族群、語言的社會語言學現象kap教育政策研究。編著《台語ABC真趣味》、《台語拍通關》、《亞洲婚姻移民女性》、《新移民、女性、母語ê社會語言學》等專書。

台文譯者｜朱志煒
屏東人，袂曉注音輸入法。用行列輸入法拍漢字，台羅用PhahTaigi kah教育部ê。手機仔、平枋kah電腦ê介面lóng是日文。教育部台檢C2專業級、成大台檢C1高級，研究所讀應用外文系，英文論文ê摘要kah謝辭用台文寫，凡勢是屏科大頭一篇有台文ê論文。高中、國中台語教師，99.9%用台語講課。Tī SNS lóng是寫台文，2012年以後blog改用台語文書寫，一直到tsín。

台文譯者｜邱偉欣
新竹出世ê高雄人。台語雖然是母語，煞因為國民教育ê關係，險險就袂曉講。經過十冬ê時間，總算koh會使用輾轉ê台語佮世界對話。本業是生命科學，2013年開始tī《台文通訊BONG報》寫科普專欄，2021年kā德文翻譯做台文ê《你無聽--過ê格林童話》出版，2023年熱天tī成功大學台灣文學系提著文學博士ê學位。用母語過生活，也有科學，也有文學，實在是tsìnn主流koh天公地道ê得意生活。

台文譯者｜紀品志
語文工，有口筆譯、語言學、語文教學ê資歷。學生時代對語言有趣味，tī台大讀農業化學ê期間接觸著語言學、語言教學kap台灣語言研究，後來去荷蘭Leiden大學讀語言學碩士，食頭路幾冬後koh學口譯。Tsit-tsūn是加拿大CTTIC、ATIO翻譯協會認證合格ê英中文書翻譯，也tī病院、學校、社福單位做通譯。2013年起參與台文社群，兼做教學、翻譯、編校、語料處理、錄音、演講、主持等等ê台語工。多倫多台灣語文中心講師、Bite-size Taiwanese共同創辦人兼英台雙語教材編校。出版著作有《Short Takes: A Scene-based Taiwanese Vocabulary Builder》。

台語校對｜謝惠貞
台南人，tī國小教台語，向望透過教學會當hōo lán ê囡á愛講台語，hōo台語繼續流傳--落去。

英文校對｜蘇凰蘭
臺東大學華語系副教授。美國Illinois University at Urbana-Champaign東亞語言文化博士。高雄人。學術興趣是新語者kap母語教育、雙語讀寫、語言學習動機kap跨語言實踐。

插畫｜鸚鵡洲
擅長繪製漫畫／插畫，參與台灣獨立遊戲《OPUS：龍脈常歌》遊戲美術製作，與原著薛西斯合作漫畫作品《不可知論偵探》。近期目標是去南極被企鵝圍繞。

有聲朗讀｜徐智崗（福摩思）
桃園人，高中老師，英語教25冬，有考過台語認證，現此時有咧學校教台語。賰ê人生欲決心推捒台語文復振。

有聲朗讀｜賴嘉仕（口白、華生、加夫利）
嘉義人，20幾冬ê台語廣播資歷，2018年提著廣播金鐘獎，現任曾文溪電台台長、「戀戀曾文溪」節目主持人。

有聲朗讀｜Soo Kái-Uí（國王/波希米亞ê見笑代、雷醫師/點仔帶奇案）
屏東人，兼職配音員，愛看布袋戲，通過教育部台檢C1，感覺羅馬字袂輸武俠內功，學予好才通拍通台語ê筋脈。

有聲朗讀｜陳椘芸（愛綾/波希米亞ê見笑代）
自細漢就開始講台語，二十二歲ê大學生。兩冬前接觸劇場，ná做演員ná做台語ê藝文工作者。

有聲朗讀｜劉雨青（史海蓮、路人甲/點仔帶奇案）
故鄉台中霧峰，工作是配音、配唱、和聲，嘛是實況主，足愛對無歌曲佮角色ê角度去體驗無ê故事佮人生。

有聲朗讀｜翁昭雯（女管家）、楊沛羚（路人乙）、柯凱訢（路人丙）、黃昱閔（路人丁）

發音指導｜Gina
台語花田ê choh-sit人。台南市國小台語教學20 thóng年，國中台語教學10外冬。

編輯｜邱芊樺
國立中央大學中文系學士、國立政治大學台灣史研究所碩士，台灣
文史主題書籍編輯。


★內文試閱：

•譯者序

Tshuā領讀者行到另外一个文化世界
朱志煒（譯者）
Tse毋是我頭擺做翻譯，頂一條大件--ê是共一本商業批信教科書規本翻了，毋過he是英文翻華文。Tsit過愛感謝麗君老師kah偉欣，予我有機會參與tsit个工課。
窮實我進前毋捌看過tsit个系列ê小說，厝--lìn敢若有華文版--ê，嘛無挈出來掀--過，頭擺看就看原文版。舞台是19世紀ê英國，hit陣仔ê hài-iah是馬車。好佳哉有google，予咱知影向時ê英國人佇厝--lìn製造汽水ê家私是生做啥款。
作者共福摩思塑造做一个頭殼精光，koh小可狡怪性、厚齣頭ê探偵，佇〈波希米亞ê見笑代〉tsit章，煞去拄著伊上意愛ê查某人愛綾．愛德勒，伊ê剋星，共福摩思ê心機攏破解--去。
///////////////
邱偉欣（譯者）
Tsit本冊兩位主要ê翻譯者是翻譯〈波希米亞ê見笑代〉ê朱志煒先生，佮翻譯〈點仔帶奇案〉ê紀品志先生。我ê任務是tuè tī in後壁，紲接做第二pái ê翻譯兼潤稿。
我感覺tsit pái án-ne ê翻譯經驗真趣味，佮其他翻譯者做伙合作翻譯一篇小說，ē-sái激頭殼，ē-sái更加深入了解英語-台語，雙語ê語言骨髓。
翻譯是一條雙頭縛tī無語言頂kuân ê鋼索，譯者是行tī鋼索面頂，tshuā領讀者行到另外一个文化世界ê牧者。向望gún tsit pái ê合作ē-sái hōo讀者有真精彩ê台語迒文化體驗。
///////////////
紀品志（譯者）
囡仔時bat讀福摩思ê華文譯本，想bē到tsit-má家己變做翻譯者。十外冬前開始學台文、讀別人ê作品，tann家己mā teh寫。「世界文學台讀少年雙語系列」頭一本《你無聽--過ê格林童話》是邱偉欣先生翻譯--ê，hit當時我買來送hōo阮阿兄、兄嫂kap in ê囡仔看。阮老母ná聽錄音ná讀，liam-mi kā規本讀了了，講tse台語ê囡仔故事tsiânn好。無疑2023年年尾，我接著偉欣ê批，講beh招我來鬥做tsit个系列！真歡喜有機會hām偉欣、志煒做伙翻譯tsit本冊。用譯者ê角度重讀〈點仔帶奇案〉，讀著íng擺無注意--著ê細節，也發見原來tsit篇小說hām一節聖經有關連，實在有影聖經是西洋文學ê一个水頭。
台語文ê工程不止艱難，需要重倍ê資源、心神、氣力。感謝麗君教授kap團隊逐个人用心拍拚，tsit个台譯本無論內容、編輯、美術方面lóng有伊特別ê價值kap品質。Tsit-má kā成果hām各位分享。若逐家ē-tàng uì內底得著一寡仔趣味，就是阮上歡喜ê代誌。

•摘文

波希米亞ê見笑代

I

　　對謝樂．福摩思（Sherlock Holmes）來講，伊一直lóng是hit个女人。我罕得聽福摩思用別ê名講著伊，在福摩思看--來，伊ê才能超越女性而且hōo女性tsit款性別分類失去意義。M̄是講伊對愛綾．愛德勒（Irene Adler）有愛情tī--leh，所有ê感情，特別是愛情hit款，lóng是伊冷靜、精確、絕對無偏失ê心智所無愛--ê。我ē-sái理解，伊是全世界揣無--ê，上蓋頂真ê觀察kah推理ê機器。M̄-koh，若是做人ê愛人仔，伊談戀愛ê話語百面ē hōo人誤解，伊m̄ bat講溫柔ê情話，suah kan-ta是khau洗、供體。Ē-sái kā人歹心行ê動機kah行為拆白，確實是觀察者hōo人欽佩ê能力。是講，若hōo感情走入去一个有訓練、有專業ê推理者ê心肝頭，就bē輸tī伊幼路koh斟酌ê氣質內底，引進一項造成擾亂ê因素，伊所有ê心理成果lóng ē出現無確定。對伊tsit款性格ê人來講，強烈感情tī心肝內底並精密儀器--裡ê沙屑──伊一台高功率hàm鏡出現ê必巡，koh-khah hōo人感覺不安。Tī福摩思已經無清楚ê記持內底，hit个已經過身--去ê愛綾．愛德勒，就是唯一ē hōo伊感情起波湧ê人。
　　Tsit站仔我真少看見福摩思，自我結婚了後阮就khah無teh往來。對我án-ne ê查埔人來講，第一擺建立家己ê家庭，感受著圓滿ê幸福kah趣味就有夠滿足，thang hōo我規心注神--ah。M̄-koh福摩思伊有放浪ê
波希米亞（Bohemian）靈魂，譬相任何形式ê社會陪tuè kah禮數，猶原蹛tī阮稅tī貝克街（Baker street）ê所在，浸tī伊規堆ê舊冊--裡，liâm-mi tsit禮拜癮龜根（cocaine），liâm-mi後禮拜就充滿事業野心，就án-ne，有時是食藥仔了ê沙微，有時koh恢復伊自來ê強烈元氣。Kah以早款，伊iáu是tsiok趣味犯罪研究，而且運用伊ê大才調kah tsiânn好ê觀察力，去跟tuè hia-ê線索，解決一寡警方感覺無希望、已經放棄ê案件。一半擺仔我有聽著伊kā人「處理代誌」ê風聲，比論hōo人叫去Oo-teh-sà（Odessa）處理Thō-phooh-huh（Trepoff）兇殺案，偵破tī亭可馬里（Trincomalee）蓋特別ê At-kin-sǹg（Atkinson）兄弟慘案，koh有上尾仔tsit擺，tsiok suí-khuì--ê成功解決荷蘭皇家ê案件。我tī報紙kah讀者分享ê消息掠外，對tsit个khah早ê老朋友kah有志ê其他狀況，我就無啥了解--ah。
1888年3月20 ê hit一暝，我tī往診tńg--來ê路--裡（Hiàng時我koh tńg來開業--ah），順tsit tsuā路koh來到貝克街，行過hit棟建築物ê門跤口，hit扇tsiok熟sāi ê門，總是kah我心內追求愛人仔，以及「血字ê研究（Study in Scarlet）」hit層烏暗事件ê記持，牽牽做伙。我雄雄tsiok想beh koh kah福摩思見面，想beh知影伊按怎使用伊ê超能力來破案。伊ê房間光iānn-iānn，我攑頭ê時，有看著伊兩擺行過窗前印tī kha-tián頂kuân瘦抽ê形影。伊ê頭ànn tī胸前，雙手揹tī後壁，tī房間內來來回回，teh等待啥物？對真了解伊ê性情kah慣勢ê我來講，伊ê態度kah動作ê意思真明顯，伊koh teh做khang-khuè--ah。伊已經uì食藥仔ê眠夢中精神--起來，注心tī tshiau揣新問題ê線索。

我gi̍h電鈴，hōo人引tshuā去一間房間內，tsit間房間khah早有一部分是我ê--neh。

伊ê態度無熱情，tsit款情形真罕--得，m̄-koh我想伊應當tsiok歡喜看著我。伊比手叫我去坐踮一liâu交椅--裡，hiat一盒仔伊ê色牙薰hōo--我，koh指壁角ê酒箱仔kah汽水罐，無講幾句話，不而過眼神tsiânn親切。伊徛tī壁爐頭前，用特有ê徛tī對方ê立場teh審查家己ê款式4 kā我相。

「你tsiok適合婚姻生活。」伊án-ne講，真確定ê款。「華生（Watson），自我頂擺看著你到tann，你大箍七磅半。」

我應講：「七磅！」

「華生--à，有影he̋nn，我應該koh ke想--寡，koh ke想一寡寡仔就好。我mā發現，你koh teh kā人看病。是講，你進前無kā我講你ē tńg去做醫生。」

「你是按怎知--ê？」

「我看ē出來，推論ē出來。無，我哪ē知你最近有hōo雨沃kah tâm koh siûnn，厝內koh有一个粗跤笨手、散形散形ê查某kán！」

我講：「福摩思--à，你án-ne真正有超過--neh！你若早出世幾百冬，早就hōo人當做有妖術ê童乩掠去判火刑燒燒--死--ah！拜四我有去庄跤行行--leh，hōo雨沃kah ná痟狗án-ne tńg--來，m̄-koh我衫to已經換過--ah，你是按怎推論--出來--ê，我真正想無！Ia̍h若講著hit箍馬里．曾（Mary Jane），伊正經是散形kah無藥醫，阮某已經kā伊警告，m̄-koh我iáu是sa無你是按怎看ē出來？」

伊對家己文文仔笑--一下，長長koh帶神經質ê雙手挲--leh挲--leh。

「這tsiok簡單……」伊講。「我看著你倒跤鞋ê內底爿，拄好是爐火tshiō--著ê所在，hit搭ê皮面有beh平行ê六tsuā裂巡。這tsiânn明顯，一定是有人tsiok粗魯想beh kā鞋底邊仔堅phí ê塗khau--落來。你看，就是án-ne生，我雙重推論出：你有tī歹天出門--過，koh有，你有一个低路ê倫敦下跤手人kā你ê皮鞋創kah裂幾若巡。講著你做醫生--hònn，若是有一个紳士行入阮兜，鼻--起來有碘酒ê味，正手指tsáinn有硝酸銀食ê烏跡，伊kuân帽仔一爿phok-phok，是tshàng聽筒ê所在，我to無teh戇koh，百面ē臆講伊是一个醫生。」

伊án-ne輕鬆說明伊ê推論過程，聽kah我愛笑。我結論講：「我聽你teh解說你按怎推論ê時，逐項代誌lóng簡單kah bē輸我mā應當ē-sái像你án-ne解決問題，m̄-koh tī你講破你ê推論進前，我iáu是對hia-ê代誌sa無tsáng。總--是，我猶原相信我ê目睭bē khah bái--你tsiah tio̍h。」

「目睭平平好是有影--lah……」伊án-ne應。點一枝薰，規个人the入去一liâu交椅--裡，「你看是有看，m̄-koh無觀察，tsit款差別tsiok清楚。比論講，你sù常看著客廳到房間hit枝樓梯ê坎。」

「Tsiok tsia̍p看--著。」

「有偌tsia̍p？」

「Ooh，幾lō百kái！」

「有幾坎你kám知？」

「幾坎？我m̄知。」

「就是án-ne！你看是有看，m̄-koh無teh觀察，這就是我一直kā你講--ê。有--無，我知影tsit枝樓梯有17坎，因為我有看mā有觀察。講到tsia，因為你對tsit寡細項問題有趣味，mā因為你tsiok gâu記錄我一寡有--ê無--ê ê經歷，你應當對這有興趣……」伊kā本底thián開囥tī桌頂、水紅ê厚筆記紙hiat--過來。「拄寄--到--ê。」伊講：「讀--出來。」

筆記紙頂kuân無註明是tang時寫--ê，mā無簽名kah住址。

筆記紙頂kuân án-ne寫：「Ing暗7點3刻ē有一位先生去sio揣，伊有真重要ê代誌beh kah你參詳。最近你kā歐洲某mí皇室處理ê khang-khuè證明講，kā要緊代誌交代hōo你，一定是穩tàng兼妥當--ê。Tsit个消息關係你--ê，阮已經uì各方面收--著，請你hit時ài有tī厝，人客若是有戴面具，請m̄-thang見怪。」

「這實在hōo人sa無tsáng！」我用憢疑ê聲講。

「你想，彼是啥物意思？」