傲慢佮偏見（台語好讀版•附台語有聲劇場∼世界文學經典，珍•奧斯汀浪漫經典「傲慢與偏見」首部台語譯本）

＜內容簡介＞ 因為愛情，予伊放下傲慢，改頭換面 因為愛情，予伊智覺偏見，激出真情意 珍‧阿斯頓傳世的浪漫經典《傲慢佮偏見》 這回，咱用台語來啖愛情的鹹酸苦汫、糖甘蜜甜 英國庄跤有一位班奈太太，伊透世人的願望，就是欲將五个查某囝全嫁出去。有一日，一位貴公子賓利按算佇班家附近稅厝做厝邊，班奈太太就想空想縫，步數盡展，欲來將查某囝佮伊捒做堆。 舞會的時，班家的大漢查某囝珍佮賓利一見鍾情，但是第二查某囝伊俐莎白，煞因為一時的態度佮誤會，對賓利的好朋友達西無好印象。後來更加因為各種事件佮使弄，予伊俐莎白對達西有濟濟偏見。 兩人原是門不當、戶不對，無話無句不投機，那知達西是一下煞著，雙方膏膏纏，結果冤家冤甲行鬥陣。一个是好額緣投、驕傲苛頭的貴公子，一位是聰明伶俐、厚思量的二小姐，𪜶的愛情，是按怎佇傲慢下底的真實面腔佮偏見背後的真相觸纏之間，沓沓仔變化發穎？一場險險仔相閃身的青春戀情，閣加一味台語，心適媠氣、氣口飽滇！ ★本書特色： 1.英台直譯，重點改寫，語詞註解，學習好讀 2.附9小時台語有聲劇場，逐章QR Code隨掃隨聽 ◎前衛出版╳心陪有聲╳杰瑞音樂，台文出版跨域呈獻 ◎文化部「語言友善環境及創作應用補助」作品 ★目錄： 推薦序　毋通放棄，咱猶有愛情　◎鄭順聰 譯者序　行佇這段「傲慢佮偏見」的歲月　◎洪淑昭 1-61章 ＜作者簡介＞ 珍‧阿斯頓　Jane Austen，1775-1817 一位真有代表性的英國女性作家。伊出世佇庄跤的牧師家庭，雖然無受過完整的正規教育，但是自細漢就誠愛閱讀寫作，經由自學佮厝內的知識教養，伊十外歲開始創作，就此顯露筆花佮文采。 珍‧阿斯頓的作品，大部分是以家己佇英國庄跤出身、生活的中產階級日常做背景。19世紀英國社會的人情世態、風俗習慣、婚姻戀愛，攏是伊主要的創作題材。透過自然活跳、趣味詼諧的語言，靈活機巧的好禮雅氣、話帶心機，雕琢人物的個性佮精神，呈現英國文化佮社會的面貌佮底蒂。 珍‧阿斯頓有六部重要的長篇小說傳世，其中的《傲慢佮偏見》（Pride and Prejudice）是伊上蓋流行、上有影響力的作品。出版了後，毋但有濟濟讀者佮意愛讀，閣經過電影、電視劇的改編佮各種延伸改寫，對後世作品有誠重要的啟發，成做當代浪漫小說的原型經典。 譯者：洪淑昭 國立高雄師範大學台灣歷史文化及語言研究所畢業，通過教育部105、107年閩南語檢定專業級認證，長期投入推動台語文教育，積極從事台語文創作。散文作品不時入選教育部全國語文競賽閩南語朗讀稿，〈巷仔內的桂花芳〉得著教育部108年閩客語文學獎散文社會組第一名。台文小說《錦荔枝的滋味》得著高雄市文化局書寫高雄創作獎助，佇2022年出版，後來佮高雄廣播電台共同合作改編做「台語文學劇場-錦荔枝的滋味」廣播劇。 審訂：鄭順聰 嘉義民雄人，嘉義高中，中山大學中文系，台師大國文研究所出業。 捌任《重現台灣史》主編，《聯合文學》執行主編，教育廣播電台《拍破 台語顛倒勇》主持人，公視台語台《HiHi導覽先生》創意發想和台語顧問。 台文作品有詩集《我就欲來去》，小說《大士爺厚火氣》，散文《台語好 日子》、《台語心花開》，繪本《仙化伯的烏金人生》。 繪者：Asta Wu 現此時是專職插畫家，畫插圖、畫繪本，嘛畫圖像小說，啖試各種創作的方式，目前當咧往寫故事的方向伐進。佮意神話、民俗傳說佮貓咪，上愛佇作品內底藏小動物佮濟濟無仝款式的彩卵。（astawu.com　IG：Asta Wu） ★內文試閱： ‧推薦序 毋通放棄，咱猶有愛情 鄭順聰 見若講著「西洋文學經典」，咱世俗人就會起緊張，目頭結結，掠做這冊深無底，讀都讀袂完，是咱一世人攏行袂入去的世界。 掠這款「偏見」來讀珍．阿斯頓是講袂通的，伊所寫的，是咱厝邊頭尾發生的大細項代誌，親切掛趣味，一點仔都袂艱難，一下點就通通通。 譬如咱這馬欲來讀的《傲慢佮偏見》，故事四常仔四常，就是佇兩百外冬前的英國，有一位班奈太太，規工用心計較欲共伊五个查某囝嫁出去。現代的讀者著愛知，彼時的英國社會和古早時的台灣仝款，做一个查某人，人生的任務就是揣一个好翁，生囝扞家到老。 真正是無公平的代誌，煞是彼个時代的現實。 就佇這時，班奈家所徛的庄跤所在，有一位叫賓利的好額人少爺講欲來附近蹛，這予班奈太太規个人精神隨來，想空想縫欲和伊熟似交陪。班奈太太的五个查某囝袂輸五張牌，只要有一張查某囝仔牌和賓利先生伨頭做一對，這phé-sih（pair）拍出去，伊做老母的這場局，就贏一半矣。 本底想講賓利這緣投仔骨是一粒一的，和大漢查某囝仔珍是真四配，佇舞會遨遨跳的時，雄雄踅一位達西出來，這位少年家嘛是緣投仔兄，手骨閣較粗，人煞激一个氣，真苛頭，有影是「傲慢」。達西先生和次女伊俐莎白因為誤會來熟似，就按呢兩个人膏膏纏，冤家囉和解啦起風波，有時踮花園講，有時寫落落長的批，成做《傲慢佮偏見》的主線。 這本西洋文學經典上了不起的，是作者共故事鋪排甲有條有段，精彩甲予人毋甘共冊放落。這場婚姻的牌局激來激去，激出男男女女的各種性地，有時戇膽、有時閉思，這時激五仁，換一个所在就假仙假觸。內底的人臆來臆去，掠做是按呢煞毋是，當面開破無夠閣補批兩三回，一項簡單的代誌愈舞愈貓，愈看是愈笑詼。咱讀者徛戲台跤看，看台頂的人有影是戇，好好鱟刣甲屎流，真毋值。 呔會按呢！是時代的制限？社會的禮防？人性的生成？ 這就是《傲慢佮偏見》仙讀都袂𤺪的原因之一，按怎想都想袂透，論都論袂了。活跳跳的人物，真拄真的對話，會興會牢的情節，是古典款的純情青春夢啊！ 珍．阿斯頓的筆路幼膩變竅，文句牽絲攀藤，定定有「附加子句」做倒鉤，規句讀完捎無意思，愛剾轉去閣讀一擺。彼時英國人講話定著好禮雅氣，愛斟酌聽才通知影真正的意思，有時去予詈顛倒毋知，話句厚心機，講話實在有夠鹹（kiâm）。 人物的關係纓纓纏纏，故事線路彎彎曲曲，咱的台文譯者洪淑昭真有牽挽，共原文全翻做二十外萬字台文，和珍．阿斯頓仝款了不起。 全本是終其尾會來出版的，猶毋過，2023 年這時的勢面，台文讀者和市草的塗肉猶未培好，驚種甲傷早無對時。所致，淑昭就來改寫做十萬捅字的「好讀版」，掠故事主要的枝骨，共人物和背景補入去，予讀者較快較順來讀小說，勻勻仔行入去台語文和珍．阿斯頓的美麗世界。 《傲慢佮偏見》台語好讀版和華語濟濟的出版品，有真濟無仝：第一是媠氣的台文，並華語加足心適的，那親像咧看八點擋連續劇。淑昭共原文的華彩膨紗㨨（liû）開，用伊的理路重繡，束結、貫串、燒烙，含（kâm）淑昭款的頂真，閣有高雄在地的話語，氣口十足。而且，淑昭有踮伊的台語課讀予學生聽，讀過一擺閣一擺，是有實際讀唸過，毋但是紙面翻的喔，予這好讀版和讀者掠閣較峇。 出版社嘛真貼心，好禮仔來錄有聲冊，請台語小丸子、前衛版《小王子》的配音郭雅瑂老師扞頭，組團隊綿精綿爛來錄廣播劇，加上心陪有聲、杰瑞音樂的專業製作，有影是聲緣好、袂跳針。 相信珍．阿斯頓佇天頂聽著伊俐莎白講台語，嘛會喙笑目笑，台文該當遮爾仔媠閣有局。像我，去予班奈太太倯甲有力的話抐著笑筋，對珍和賓利彼款枵鬼假細膩氣甲惱甲，拄著達西對伊俐莎白告白彼葩，雄雄忽然間我無法度喘氣矣⋯⋯。 著愛相信，愛情永遠佇遐，毋通放棄，因為《傲慢佮偏見》，予咱踮這茫茫渺渺的世界，猶原相信愛情的力量。 ‧摘文 一个少年又閣好額的獨身仔，一定愛有一个家後，這是通人知的道理。 是講，這个獨身仔到底是熊是虎，這就毋是討論的重點矣！橫直只要有這款人搬來做厝邊，厝邊隔壁逐个就目睭金金金，想空想縫欲將家己的查某囝嫁予伊。 班奈太太就是這款的查某人。 這工，伊誠歡喜對翁婿講：｢翁的！你敢有聽人講尼德菲山莊稅出去矣？ ｣ 班奈先生聽著太太若火雞母的聲，目頭結結，回講無聽別人講起。 ｢毋過，拄才來的郎太太已經全部講予我聽矣呢！ ｣ 班奈先生猶是恬恬。 班奈太太看𪜶翁無攬無拈，就大聲共伊喝：｢你敢無想欲知影到底是啥人欲來蹛？ ｣ ｢你若想欲講予我聽，我是袂反對啦！ ｣ ｢翁的，我共你講！郎太太講尼德菲山莊已經予一个對北部來的好額人稅去矣，頂禮拜一彼工，這个少年家仔坐一台四輪的來，呼！伊對彼間厝是滿意甲！隨就共決落來！聽講是九月底進前就會搬入來，伊後禮拜會派下跤手人先過來款厝內。｣ ｢伊姓啥？ ｣ ｢賓利。｣ ｢娶矣未？ ｣ ｢呼！猶未咧！翁的！我齊探聽清楚矣！一个猶未娶又閣好額的少年家仔，聽講干焦利息，一年就有四、五千英鎊！這對咱查某囝來講，真正是足好空的！ ｣ ｢哼！這佮咱查某囝有啥底代啊？ ｣ ｢老爺！你講彼是啥物話啦？你敢毋知這个人一定會娶咱其中一个查某囝？ ｣ ｢喔！當時仔伊搬來遮蹛，心內擉的是這款算盤喔！｣ ｢擉啥物算盤啦？烏白講！毋過，伊一定會去煞著咱查某囝，所以，伊若搬來，你隨著愛去伊遐行行坐坐咧，先熟似一下。｣ ｢我看無這个必要，若欲，恁去就好。啊！我看你毋通綴恁查某囝去啦！若無，親像你遮妖嬌美麗，凡勢賓利先生煞著的人是你喔！｣ ｢翁的，你是家己褒較袂臭臊，是毋？論真講起來，人我少年的時是烏貓姊仔呢！只是講，現此時連查某囝都聽好通嫁矣，人哪看會佮意我這个oo-bá-sáng？｣ ｢你講了嘛有影，像你食甲這个歲，免向望矣啦！｣ ｢橫直賓利若搬來，翁的，你定著愛去拜訪！｣ ｢哎！做這款代誌是欲創啥啦？｣ ｢你嘛愛替咱彼幾个查某囝小拍算一下！這層姻緣若有成，喔！彼就不得了喔！我不管啦！你一定愛去！翁的，你無先去拜訪阮就去行踏，會予人笑阮大面神啦！｣ ｢敢會？恁就做恁去哪有要緊啦？我閣會寫一張批予你紮過去，通予伊知影，毋管是佗一个查某囝，我攏誠歡迎伊來娶。尤其是咱俐絲，我一定會特別呵咾伊的。｣ ｢都無咧痟講！我就是想無，俐絲曷無較出色，生做也無珍的一半仔媠，嘛無親像咱上細漢的好鬥陣，顛倒你上蓋疼伊。｣ ｢咱彼幾个查某囝，按怎看攏仝款性，無啥物會呵咾得的。｣班奈先生講，｢攏是無腦筋，做代誌攏用土想的，俐絲就較有頭殼，加誠伶俐喔！｣ ｢老爺！你哪會按呢講咱查某囝咧？你就是愛共我惱氣，一點仔都無帶念我腦神經衰弱。｣ ｢某的，你誤會我誠深喔！我哪會敢無帶念你的神經咧？愛知呢，我佮你的神經捌遐久矣，定定聽你不時咧提起，上無嘛聽欲二十冬有矣。｣ ｢哎喲！你攏毋知影我的艱苦啦！ ｣ ｢知也罷，毋知也罷。總是，你愛較緊好起來，按呢才會當看著一年有四千英鎊的少年家仔搬來做你的厝邊。｣ ｢彼有啥物路用？就算來二十个，若攏無去共人拜訪，敢有較縒！｣ ｢某的，你聽我講，若真正有二十个搬來做咱厝邊，我一定隨个仔隨个去拜訪。｣ 班奈先生就是遮爾仔詼諧佮狡怪，雖然平常時仔無啥愛開喙，毋過若是欲佮人諍，伊是袂輸人。班奈太太嫁伊嫁欲二十三冬矣，到今猶是掠伊的心肝掠袂著。 班奈太太這个人就較好理解矣。伊是一个番顛、愛踅踅唸的查某人，性地若柴耙咧，若無順伊的意就佇遐咧哼哼叫，講伊神經閣咧衰弱矣！伊人生上重要的代誌，是共彼幾个查某囝嫁出去。就按呢，伊就規工四界揣厝邊咧探聽，講東講西、拍抐涼。