相思島嶼

＜內容簡介＞ 活佇一座使人相思ê島嶼 寫出一部數念島嶼ê歌詩 府城作家陳正雄接紲《戀愛府城》、《眠夢南瀛》ê系列地景詩集創作，完成「土地三部曲」第三集《相思島嶼》，描畫台灣各地有關地方、人物、歷史、文化、自然ê萬項世情。寫實ê詩筆，有對實景聯想島國運命ê深刻感嘆，也有將個人感受、人生體悟寫入風景，將自我存在化入眼前一切ê情思。跤步前後，有對台灣上深ê疼痛；字句之間，有對未來上媠ê向望。 ◎本作品榮獲國藝會出版獎助 ★目錄： 自序 寫詩講島嶼相思 第1輯 南方心情 〔台南〕 看袂著林木茂生ê校園－佇成大校園 期待明仔載ê人－佇228紀念館 等待天光－佇王育德紀念館 食夢ê獸－讀葉石濤作品集 鹽桑仔樹－佇湯德章紀念公園 水滸心事－看運河夜景 台灣合奏 島國交響－聽蕭泰然演奏曲 大天后宮身世 2015.0519 城市暴動記事 奇美博物館 曾文溪跤跡 台江內海滄桑 〔高雄〕 曹公圳記事 衛武營手記 斜張橋夜景 興達港碼頭 高屏溪芒花 高雄港素描 六合路夜市 土地ê聲音－訪鍾理和紀念館 美濃油紙傘 笑詼寮詩人 柴山風雲 愛河心情－氣爆事件 〔屏東〕 風雨‧北大武 鵝鑾鼻燈塔 第2輯 東爿背影 〔台東〕 東海岸歇暝 太平洋賞月 太麻里出日 三仙台石頭 大關山磅空 大坡池釣客 〔花蓮〕 後山蓮花 太魯閣 清水斷崖 瓦拉米古道 〔宜蘭〕 先行ê良知－蔣渭水 消失ê青天－陳定南 離遠ê背影－林義雄 第3輯 北地往事 〔基隆〕 廟口夜市 八斗子漁港 〔台北〕 101大樓 台師大校園 鄭南榕紀念館 九份老街 烏來水沖－山佮水對話 淡水街頭 野柳女王頭 〔桃園〕 慈湖 舊街心情 〔新竹〕 風 米粉 玻璃 濛霧‧大霸尖 〔苗栗〕 木雕 火焰山 油桐佮山櫻（一） 油桐佮山櫻（二） 油桐佮山櫻（三） 第4輯 中部印象 〔南投〕 讀山－𬦰玉山記 寫水－泅明潭記 〔台中〕 東海花園寫真 桃山水沖－送予瑞銘兄 第5輯 西岸跤跡 〔彰化〕 田尾花園 八卦山大佛 〔雲林〕 六輕工業區 北港朝天宮 虎尾糖廠 〔嘉義〕 達娜伊情歌 中央圓環噴水池 嘉義公園石龜碑 第6輯 島外記憶 〔金門〕 酒廠 太武山公墓 毋忘在莒石碑 馬山觀測所 瓊林坑道 風獅爺 碉堡 地雷 菜刀 軌條砦 〔馬祖〕 老酒 〔澎湖〕 隨香記 〔綠島〕 綠色ê心 朝日溫泉 〔蘭嶼〕 人之島 飛烏季 獨木船 附錄｜作品得獎紀錄 ＜作者簡介＞ 陳正雄　Tân Tsìng-hiông 1962年出世佇台南縣柳營鄉，現此時蹛佇台南市安平區，國立台南一中教師退休。 1998年開始台文創作，得過幾个文學獎，出過幾本台文冊。《相思島嶼》是作者「土地三部曲」ê第三本、也是系列最後一本詩集。 ★內文試閱： ‧自序 寫詩講島嶼相思 《相思島嶼》是我對《戀愛府城》、《眠夢南瀛》以後，所完成ê第三本廣義ê地景詩集，嘛是我ê寫作計畫內底，「土地三部曲」ê上尾一集，書寫ê範圍、題材佮質量，攏比進前兩本有較闊、有較濟，應該嘛有較好。 雖然本詩集是佇2022年才全部完成，毋過，內底大部份ê作品，是佇這幾仔冬來沓沓仔累積出來ê，無仝ê時間，嘛代表我無仝ê想法，總是，希望伊是有一直咧改變佮進步。 感謝國藝會各位評審，會當提供我這个出冊ê機會；嘛感謝前衛出版社，願意出版這款較少人看ê作品。 土地ê故事佮家己ê心情，一直是我創作台語詩ê兩个方向，今仔日，總算完成其中一件任務。紲落來，希望會當閣再順利完成另外一个心願，「心情三部曲」：《失眠集》、《白髮記》ê第三部《？》，冊名已經想好矣，內容猶未落筆。 陳正雄 ‧摘文 ［台南］ 看袂著林木茂生ê校園－佇成大校園 你是上帝用心血滴落佇這塊島嶼ê一粒種子 佇滿清皇朝坎坷拋荒ê土地頂頭釘根莩穎 佇日本帝國炎日嚴酷ê考驗之下伸枝展葉 嘛捌受過西方社會自由民主風雨ê吹動佮洗禮 一方面你用枝葉全力伸向曠闊ê天頂 共四面八方爭取性命閣較濟ê空間 證明人生存在ê意義佮價值 一方面你共樹根拚命鑽入上深ê塗底 佇無人看見無人要意烏暗ê所在 搜集社會低層ê現實佮真相 成做將來你愛努力ê方向佮你欲成長ê養份 你粗勇ê身影化做一片秋凊ê溫柔 為濟濟迷失ê羔羊提供庇護ê陰蔭佮停歇ê安穩 你懸大ê身軀徛佇這跡狹隘ê島嶼 逐工看對遠遠彼片開闊大陸佮久長歷史ê方向 想袂到無張持 煞發覺彼个封閉ê社會自然形成ê野蠻佮壓霸 嘛認清這款古老ê帝國長期累積出來ê漚爛佮腐敗 真相哪會當予你簡單就來發覺　洩露 抓耙仔當頭白日將你連根挖起 特務仔透暝無停共你分枝斷葉 閣用一條蠻橫ê草索一領冰冷ê鐵網共你綑縛掩崁 拗曲佇歷史偏僻ê壁角禁忌ê暗地 此去幾十年來 校園內看袂著你正直ê身影 課本裡揣袂出你簡單ê名姓 有人傳聞 捌佇風雨基隆河ê岸邊看過你孤單沉重ê跤步 有時風聲 會佇半暝六張犁ê山內聽著你苦悶淒涼ê唉嘆 佇某囝暝日數念ê夢裡 都攏毋敢現身袂當相見 因為鷹犬ê爪牙總是無所不在無所不能 恐驚小可仔無細膩就去予𪜶拆裂咬碎唯 一ê向望 等到聽無銃聲看無血流ê數十冬後 早前予你牽教受你啟蒙過ê一寡學生 總算有人勇敢徛出來 共你佇烏枋前曾經留落來ê殘影碎片 一絲一線沓沓仔補紩起來 將你佇課堂內強欲消失去ê輕聲細說 一點一滴勻勻仔收集轉來 勉強揣出你早前ê模樣 期待會當閣再轉去彼段難忘ê日子 毋知佗一个頭殼猶予戒嚴封鎖內心寄生特務幽靈ê人 竟然共你收囥佇彼个烏暗冰冷ê地下室內 就親像閣再一擺ê關禁 毋但看袂著天日 連放風ê時間都予𪜶剝削 幾萬坪ê土地 敢講無一个所在會當予你容身予你徛起 近百年ê校史 竟然漏過彼段重要ê字句彼張珍貴ê頁面 透早到暗來來去去出出入入ê跤步 看無幾个人暫停落來 捌聽過你含冤ê嘆氣 對下到頂幾樓懸ê冊架數萬本ê藏書 敢有佗一本完整詳細 會寫著你驕傲ê故事 淺薄ê視野狹隘ê眼光 干焦看會著面前氣派ê大樓先進ê設備 看袂著林木茂生ê校園 是欲按怎成做頭腳頂尖予人欣羨一流ê大學 /////////////////// 期待明仔載ê人－佇228紀念館 無 你無毋著 你所讀ê冊無毋著 伊真正是確確實實 一筆一畫ê烏字 寫佇彼一張一張ê白紙頂面 無 你無毋著 你所受ê教育無毋著 伊有影是清清楚楚 一字一句ê良知 刻佇你有肉有血ê心肝內底 是你出世ê時代無拄好 是你面對ê政權有問題 你ê抗議 就親像一粒石頭 摃袂醒𪜶無天無地ê思想 顛倒摃破𪜶虛假ê自大 𪜶所知ê干焦是貪污佮腐敗 你欲改革 袂輸是一束利光 炤袂清𪜶無情無理ê烏暗 只是刺傷𪜶狹隘ê自卑 𪜶所看ê只有是權勢佮利益 𪜶所想所做ê代誌 你真歹去理解無法度相信 是講 你ê筆跡猶閣佇咧 咱ê希望猶無失落 相信總會有一工 你等會著烏白佮是非分明ê日子 咱看會著公平佮正義降臨ê世間 /////////////////// 等待天光－佇王育德紀念館 對1949年彼冬熱人 青狂走離開台灣 到1985年入秋 雄雄佇日本過身 你一直無機會閣再倒轉來 台灣ê形影佇你ê夢裡愈來愈清楚 故鄉ê字畫佇你ê筆下愈來愈沉重 用咱ê喙舌共母語一句一句鬥做伙 成做一首詩 佇海ê這爿 呼叫你踅翻頭 用咱ê筆尖共台文一字一字牽相連 鞏出一條橋 對海ê彼岸 引𤆬你行過來 你一步一步踅翻頭行過來 早前予𪜶 用權力ê牢籠關禁佇記憶ê海外 用欺騙ê坱埃掩崁佇真相ê塗底 拗曲kah強欲認袂出來ê身影 愈來愈明顯 抹烏kah將近看袂清楚ê面容 愈來愈清楚 這時陣 袂閣有看著特務早暗咧跟蹤監視 無閣再聽見銃聲四界咧擾亂恐嚇 極加是 一寡魚仔定定探頭出來偷看 幾隻厝鳥不時公開走來攪吵 今仔日起 咱看會著ê是國內外無分男女大細 用𪜶好玄ê目神 對舊老ê相片頂面 沓沓仔走揣長久以來 就罕得出現ê往過 咱聽會著ê是規台灣毋管東西南北 用𪜶激動ê心情 佇生份ê文字內底 輕輕仔唸起真久以前 予咱放袂記ê故事 行過千萬里遠ê路途 漂泊ê跤步 欲永遠佇這塊土地停倚靠岸 無愛繼續流浪 回歸ê靈魂 會一直徛家己ê故鄉安心歇睏 無欲閣再苦悶 經過六十外冬ê長暝 堅持毋捌搖動方向毋捌改變 烏暗將欲過去希望就佇頭前 踮這个所在 我佮你做伙 靜靜 等待　天光